కవిత - 13

                             అసామాన్యుడు

నువ్వు .....
మామూలు మానవుడివి కానేకావు.
గుండెల్లో గుడిగంటల కోలాహలాన్నీ
అడుగుల్లో ఐరావతాల పురోగమనాన్నీ
చేతుల్లో చేతస్సుధాకలశాన్నీ
మాటల్లో బీజాక్షరాల విన్యాసాలనూ
చూపుల్లో దివ్యాస్త్రాల వాడినీ
రూపంలో దాపరికంలేని దైవత్వాన్నీ
రంగరించుకున్నవాడివి!
నువ్వు తలచుకుంటే
అక్షాంశాలూ రేఖాంశాలూ
నీ యింటి ముంగిట
సంక్రాంతి ముగ్గులౌతాయి.
చందమామ గిన్నెలోని వెన్నెల వెన్నముద్దలు
నేల పాలౌతున్నందుకు నిట్టూర్చకు ....
స్తబ్ధుడవై కూర్చోకు ...
నీకోసం ముంచుకొస్తున్న వెలుగు వెల్లువలో
కాసేపు కరిగిపోతే చాలు ....
..... నువ్వు అసామాన్యుడవే!
రచన - శంకర్ (28-2-1985)